लवंग (युगारंभ )-अहमदनगर ग्रामीणचे पोलीस उपअधीक्षक संपतराव ज्ञानोबा भोसले व निता संपतराव भोसले यांची कन्या ऋतुजा हिने चीनमध्ये झालेल्या आशियाई टेनिस क्रीडा स्पर्धेतील मिश्र दुहेरी गटात भारताला सुवर्णपदक मिळवून देत इतिहास रचला आहे. लवंग ग्रामस्थांच्या वतीने पुणे एअरपोर्टवर टेनिसपटू ऋतुजा भोसले या सुवर्णकन्येचे उत्साहात जंगी स्वागत करण्यात आले.
माळशिरस तालुक्याच्या पूर्व भागात केवळ ६,००० लोकसंख्या असणाऱ्या छोट्याशा गावातील ही सुवर्णकन्या. ऋतुजा हिला लहानपणापासून टेनिस खेळाविषयीं आवड होती वडील पोलीस सेवेत कार्यरत आहेत.तेही कॉलेज विश्वात भालाफेक चे राष्ट्रीय खेळाडू होते. वडिलांकडून मिळालेला खेळाचा वारसा तिने जपला आणि आपल्या माता पित्याचे स्वप्न पूर्ण केले.
ऋतुजा मुळे गावची शान वाढली आहे याचा अभिमान ग्रामस्थांना, माळशिरस तालुक्याला, सोलापुर जिल्ह्याला, महाराष्ट्राला आणि सपुंर्ण भारत देशालाच तिचा सार्थ अभिमान वाटत आहे. जगभरातून तिच्यावर अभिनंदनाचा वर्षाव होत आहे. पंचक्रोशीत जागोजागी तिचे बॅनर्स लावून कौतुकाचा अभिमानाचा, आनंदाचा वर्षाव ग्रामस्थ करताना दिसत आहेत.
वडिलांच्या गळ्यात सुवर्णपदक-
पुणे एअरपोर्टवर येताच सनई- चौघडे, ढोल- ताशाच्या गजरात ऋतुजाचे स्वागत ग्रामस्थानी केले. देशाची शान तिरंगा ध्वज तिच्या खांद्यावर लपेटताच आपल्या दोन्ही हातानी ध्वज सांभाळीत ती वडिलांच्या दिशेने आली आणि आपल्या गळ्यातील सुवर्णपदक जन्मदात्याच्या गळ्यात घालताच पितापुत्रीची गळाभेट झाली. कर्तव्यदक्ष डी वाय एस पी असणाऱ्या पित्याच्या डोळ्यातून आनंदाश्रूचा झरा वाहु लागताच ग्रामस्थ व उपस्थितांचेही डोळे पाणावले.
लवंगच्या वतीने नागरी सन्मान-
ग्रामस्थांच्या आनंदाला तर सीमा राहिली नाही. आमच्या लवंगची सुवर्णकन्या जगात भारी म्हणून गर्वाने छाती फुगवून गावकरी तिचे कौतुक करीत आहेत.देशाचा अभिमान असणारी सुवर्णकन्या ऋतुजा भोसले हिचा नागरी सन्मान लवंगकरांच्या वतीने करण्यात येणार आहे. सोलापूर जिल्ह्यात प्रवेश करताच सराटी पूल येथून ते लवंग गाव इथपर्यंत भव्य अशी मिरवणूक काढण्यात येणार असून, विविध मान्यवरांच्या उपस्थितीत ऋतुजा हिचा सन्मान 25/4 येथे लवंगकरांच्या वतीने करण्यात येणार आहे.-विक्रम भोसले (पोलीस पाटील, लवंग )
